Mu mikino yo mu itsinda ryiswe Nili ryo mu irushanwa rya Basketball Africa League, ikipe ya Al Ahly yo mu Misiri yatsinze Ferroviario da Beira yo muri Mozambike mu mukino ufungura wabaye ku wa gatatu tariki ya 26 Mata 2023.
Al Ahly yakiniraga mu rugo yatsinze amanota 92 kuri 74. Abakinnyi nka Michael Thompson, Omot Anunwa, Amr El Gendy na Marawan Sarhan b’iyi kipe yo mu Misiri bari mu bigaragaje cyane muri uyu mukino. Ku ruhande rwa Ferroviario da Beira, Najeal young, Willy Perry, Ayade Munguambe na Bourama Sidibe bagerageje kwihagararaho ariko birangira bashyizwemo ikinyuranyo cy’amanota 18.
Umukinnyi Omot Anunwa wa Al Ahly ni we wabaye imukinnyi w’intyoza muri uwo mukino wabereye mu nzu y’imikino yitiriwe Hassan Moustafa i Kayiro mu Misiri. Uyu musore wo muri Sudani y’Epfo we ku giti ke yatsinze amanota 21.
Imikino yo muri iri tsinda rya Nili irakomeza kuri uyu wa kane tariki ya 27 Mata. Guhera i saa kumi n’imwe z’umugoroba ku isaha y’i Kayiro mu Misiri ari na yo saha yo mu Rwanda, ikipe ya Seydou Legacy Athletic Club yo muri Guineya irakina na Cape Town Tigers yo muri Afurika y’Epfo hanyuma mu mukino uza gutangira saa mbiri n’igice z’ijoro Petro de Luanda yo muri Angola ikaza gukina na City Oilers yo muri Uganda.
Jean Claude MUNYANDINDA