Monday, March 4
Shadow

BAL 2024: Amakipe 12 azaseruka yose yamaze kumenyekana

Amakipe 12 azitabira irushanwa rya Basketball Africa League ry’umwaka wa 2024 yamenyakanye nyuma y’uko hagaragaye amakipe 3 yari asigaye.

Ayo makipe atatu yabonye itike bwa nyuma ni Cape Town Tigers yo muri Afurika y’Epfo, City Oilers yo muri Uganda ba Dynamo yo mu Burundi. Ni nyuma y’irushanwa rya Elite 16 ku makipe yo mu kerekezo k’iburasirazuba (East Division) yabereye i Johannesburg muri Afurika y’Epfo kuva ku itariki 21 kugeza ku ya 26 Ugushyingo 2023. Cape Town Tigers ni yo yegukanye umwanya wa mbere muri iki kerekezo itsinze City Oilers amanota 70 kuri 68. Dynamo yabonye umwanya wa gatatu nyuma yo gutsinda COSPN yo muri Madagasikari amanota 79 kuri 78.

Cape Town Tigers

Aya makoipe atatu yiyongereye ku yandi atatu yaboneye itike ya BAL 2024 mu irushanwa rya Elite 16 ku makipe yo mu kerekezo k’iburengerazuba (West Division) ryabereye i Yawunde muri Kameruni  ari yo Bangui Sporting Club yo muri Repubulika ya Santarafurika, FUS Rabat yo muri Maroke na Al Ahly Benghazi yo muri Libiya.

City Oilers

Aya yose uko ari atandatu aza asanga andi makipe 6 yabonye itike ya BAL atagombye guca mu majonjora ayo ari yo yose kubera ko, yo ubwayo, cyangwa andi makipe bakomoka mu gihugu kimwe yagiye yitwara neza mu mikino ya BAL yo mu myaka yashize. Ayo makipe atandatu yasonewe amajonjora ni Al Ahly yo mu Misiri ari na yo yatwaye igikombe cya BAL 2023, US Monastir yo muri Tuniziya, Petro de Luanda yo muri Angola, AS Douanes yo muri Senegali, APR Basketball Club yo mu Rwanda na Rivers Hoopers yo muri Nijeriya.

Dynamo

Aya makipe 12 azashyirwa mu matsinda atatu (conferences). Hari itsinda rya Kalahari rizakinira muri Afurika y’Epfo muri Werurwe 2024, itsinda rya Nili rizahurira mu Misiri muri Mata 2024 n’itsinda rya Sahara rizakinira muri Senegali muri Gicurasi 2024. Imikino ya kamarampaka ndetse n’umukino wa nyuma izabera mu Rwanda muri Gicurasi na Kamena 2024.

Jean Claude MUNYANDINDA

Leave a Reply

Your email address will not be published. Required fields are marked *