Kuva ku itariki ya 1 kugeza ku ya 4 Ukuboza 2025 intumwa z’u Rwanda zitabiriye ihuriro mpuzamahanga ry’abakora mu bukerarugendo bwo mu rwego rwo hejuru ILTM mu mujyi wa Cannes mu Bufaransa.
Iri huriro ngarukamwaka rihuza abantu baturutse hirya no hino ku isi bategura ingendo n’ibindi bikorwa ba Mukerarugendo bakenera (Tour Operators). ILTM ni amagambo y’impine ya International Luxury Travel Market mu rurimi rw’Icyongereza; mu Gifaransa ni Marché International du Voyage de Luxe.
Abaharagariye u Rwanda na bo bitabiriye uwo mubonano barimo intumwa z’Urwego rw’Igihugu rw’Iterambere mu rwanda RDB, ba rwiyemezamirimo b’Abanyarwanda bashoye imari mu gutegura ingendo ndetse n’abahagarariye Ambassade y’u Rwanda mu Bufaransa.
Babonye umwanya wo kugaragaza intambwe ikomeye u Rwanda rumaze gutera mu bukerarugendo bashimangira umuhate bakomeje gushyiramo ngo isura y’u Rwanda irusheho kugaragara neza hifashishijwe ibyiza bitatse iki gihugu.
Wabaye n’umwanya mwiza wo gusangizanya n’abandi bari bitabiriye iri huriro ubunararibonye bwafasha kwigira kuri bagenzi babo. Intumwa z’u Rwanda kandi zaboneyeho no gutangiza ibiganiro byatuma haboneka abandi bafatanyabikorwa bashya mu rwego rw’ubukerarugendo.
Jean Claude MUNYANDINDA