Irushanwa ngarukamwaka rya Basketball Africa League BAL 2025 ryarangiye ku wa gatandatu tariki 14 Kamena 2025 risiga ikipe ya Al Ahly Tripoli yo muri Libiya ari yo itwaye iki gikombe cyari gikiniwe ku nshuro ya gatanu.
Muri iri rushanwa ryari rimaze iminsi ribera mu mujyi wa Pretoria muri Afurika y’Epfo, mu mukino wa nyuma Al Ahly Tripoli yatsinze Petro de Luanda yo muri Angola amanota 88 kuri 67. Al Ahly yaratunguranye muri iri rshanwa kuko yari iryitabiriye ku nshuro ya mbere. Umukinnyi wayo Jean Jacques Boissy ukomoka muri Senegali akaba asanzwe akinira ikipe ya REG Basketball Club yo mu Rwanda ni we watowe nk’umukinnyi w’irushanwa (MVP).
Indi kipe yitwaye neza mu buryo benshi batatekerezaga ni APR Basketball Club yegukanye umwanya wa gatatu ku wa gatanu tariki 13 Kamena 2025 itsinze Al Ittihad yo mu Misiri amanota 123 kuri 90. Iyi kipe y’abasirikare b’u Rwanda yisubiyeho ku buryo bugaragara nyuma y’aho igaragaje intege nke mu irushanwa rya BAL 2024 ubwo yaviragamo mu mikino yo ku rwego rwa conference ikananirwa gukatisha itike y’imikino ya Kamarampaka yabereye mu Rwanda.
Kuva Basketball Africa League yatangira, aya ni yo makipe amaze kwegukana ibikombe:
2021: Zamalek (Misiri)
2022: US Monastir (Tuniziya)
2023: Al Ahly (Misiri)
2024: Petro de Luanda (Angola)
2025: Al Ahly Tripoli (Libiya)
Jean Claude MUNYANDINDA