Ku wa gatanu tariki 13 Nzeri 2024 mu nzu y’imikino ya BK Arena i Remera, ikipe y’APR Basketball Club yatsinze Patriotes Basketball Club mu mukino wa kabiri wa finales za kamarampaka z’igikombe cya shampiyona y’umukino wa Basketball mu Rwanda mu kiciro cya mbere mu makipe y’abagabo.
Uyu mukino warangiye ikipe y’abasirikare b’u Rwanda ifite amanota 101 kuri 93 ya Patriotes Basketball Club. APR Basketball Club yakunze kuyobora mu duce tubiri tubanza ariko Patriotes Basketball Club iza kuyihindukirana ku buryo uduce tune tw’umukino twarangiye impande zombi zinganya amanota 86 kuri 86. Hitabajwe iminota 5 y’inyongera hanyuma APR Basketball Club igarukana imbaraga itsinda umukino ku manota 101 kuri 93.
Ku mikino 7 igomba gukinwa muri kamarampaka za nyuma, hamaze gukinwa imikino 2. Patriotes Basketball Club yari yatsinze umukino wa mbere ku manota 83 kuri 71. Ku cyumweru tariki 15 Nzeri 2024 hateganyijwe umukino wa gatatu.
Abakurikiranira hafi iyi mikino ya playoffs, barasanga iki kiciro kitazoroha kuko buri ruhande rufite abakinnyi bakomeye. Muri APR Basketball Club, abakinnyi ngenderwaho ni Isaiah Miller, Axel Mpoyo, Jean Jacques Wilson Nshobozwabyosenumukiza na Aliou Diarra. Ku rundi ruhande, amizero ya Patriotes Basketball Club iyashingira ku basore bayo b’intyoza barimo Stephaun Branch, Dieudonné Ndizeye na Steve Hagumintwari.
Ikipe izatanga indi gutsinda imikino ine muri uru rugamba rw’imikino irindwi, izahita yegukana igikombe cya shampiyona y’uyu mwaka ikazanahagararira u Rwanda mu irushanwa rya Basketball Africa League (BAL 2025).
Jean Claude MUNYANDINDA