Ku wa gatatu tariki ya 4 Nzeri 2024 mu Sitade Ntoya y’i Remera habereye imikino y’umunsi wa gatatu w’imikino ya kimwe cya kabiri k’irangiza muri kamarampaka yo guhatanira igikombe cya shampiyona ya Basketball mu kiciro cya mbere mu bagabo. Iyi mikino yasize APR Baskeball Club na Patriotes Basketball Club zitsindiye kuzakina imikino ya nyuma.
Mu mukino wabanje, ikipe ya Patriotes Basketball Club, nk’uko byari byitezwe na benshi, yatsinze Kepler Basketball Club amanota 89 kuri 66. Iyi yari intsinzi ya gatatu ya Patriotes kuri Kepler bityo umutoza Henry Mwinuka n’abasore be bahita bakatisha itike yo gukina kamarampaka za nyuma.
Umukino wakurikiyeho wari ishiraniro hagati y’APR Basketball Club na REG Basketball Club. APR Basketball Club yari yatsinze imikino ibiri ibanza, REG Basketball Club na yo igifite ikizere cyo gutsinda umukino wayo wa mbere hanyuma urugamba rwa kamarampaka muri kimwe cya kabiri k’irangiza rukaba rwakomeza. Izo nzozi za REG Basketball Club zashyizweho akadomo kuko APR Basketball Club yayitsinze ku nshuro ya gatatu ku manota 66 kuri 61.
Imikino ya nyuma ya kamarampaka izatangira ku wa gatatu tariki 11 Nzeri 2024 hagati ya Patriotes Basketball Club y’abasore b’intyoza nka William Perry, Stephaun Branch, Steve Hagumintwari na Dieudonné Ndizeye n’APR Basketball Club ifite ba kabuhariwe nka Isaiah Miller, William Robeyns na Axel Mpoyo.
Aya makipe azahatana ashaka gutanguranwa gutsinda imikino ine mu mikino irindwi itaganyijwe muri iki kiciro cya nyuma cya kamarampaka. Ikipe izatanga indi gutsinda kane izahita yegukana igikombe cya shampiyona cy’uyu mwaka ikazahagararira u Rwanda mu irushanwa rya Basketball Africa League (BAL 2025).
Jean Claude MUNYANDINDA