Ikipe yari ihagarariye u Rwanda mu irushanwa rya Basketball Africa League (BAL 2025) APR Basketball Club yatsinzwe na Al Ahly Tripoli yo muri Libiya ku ntera ya kimwe cya kabiri k’irangiza mu mikino ya Kamarampaka irimo kubera mu mujyi wa Pretoria muri Afurika y’Epfo.
Uyu mukino wabaye ku wa gatatu tariki 11 Kamena 2025 warangiye Al Ahly Tripoli irushize APR Basketball Club ku buryo budasubirwaho kuko yayitsinze amanota 84 kuri 71. Ikipe y’abasirikare b’u Rwanda nyamara yari yatangiye umukino neza ariko mu gace ka gatatu ibintu byahinduye isura, ibyari byagezweho na Youssoupha Ndoye, Aliou Diarra, Chasson Randle, Anunwa Omot, Ntore Habimana, Obadiah Noel na bagenzi babo biburizwamo n’ubuhanga bw’abasore b’intyoza ba Al Ahly Tripoli barimo Jaylen Adams, Fabian White, Caleb Agada, Assem Marei na Mohammed Abdourahman Sadi.
Iyi ni inshuro ya gatatu Al Ahly itsinda APR Basketball Club muri iri rushanwa rya BAL 2025 kuko no mu mikino y’amakipe yo mu itsinda rya Nili yabereye i Kigali yari yayitsinze imikino yombi uko ari ibiri.
Ku mukino wa nyuma uteganyijwe ku wa gatandatu tariki 14 Kamena 2025, Al Ahly Tripoli izahura na Petro de Luanda yo muri Angola yasezereye Al Ittihad yo mu Misiri iyitsinze amanota 96 kuri 74. Ku wa gatanu tariki 13 Kamena 2025 APR Basketball Club izahura na Al Ittihad mu mukino wo guhatanira umwanya wa gatatu.
Uko amakipe yagiye yegukana ibikombe mu irushanwa rya Basketball Africa League:
2021: Zamalek (Misiri)
2022: US monastir (Tuniziya)
2023: Al Ahly (Misiri)
2024: Petro de Luanda (Angola)
Jean Claude MUNYANDINDA