Mu ijoro ryo ku cyumweru tariki 6 Ukwakira 2024 ikipe y’abagore ya REG Basketball Club yatsinze APR Basketball Club umukino wa kabiri wa kamarampaka mu rugamba rwo guhatanira igikombe cya shampiyona uyu mwaka wa 2024.
Uyu mukino warangiye ari amanota 76 ya REG Basketball Club kuri 51 y’APR Basketball Club. Abakinnyi barimo Rosine Micomyiza, Destiney Philoxy, Victoria Reynolds na Kristina King barigaragaje cyane ku ruhande rwa REG Basketball Club.
Muri APR Basketaball Club, Yoro Diakite na Assouma Uwizeye bagerageje uko bashiboye ariko baza kurushwa imbaraga. Muri iyi nkundura yo gutanguranwa gutsinda imikino ine kuri irindwi iteganyijjwe muri kamarampaka, REG Basketball Club imaze gutsinda ibiri yikurikiranya. Mu mukino ubanza REG Basketball Club yatsinze APR Basketball Club amanota 68 kuri 67.
Ku wa gatatu tariki 9 Ukwakira 2024 hazaba umukino wa gatatu. Na wo uzabera kuri Sitade Ntoya y’i Remera nk’uko byagenze mu mikino ibiri ya mbere.
Jean Claude MUNYANDINDA