Mu ijoro ryo ku itariki ya 25 Kamena 2025 mu nzu y’imikino ya BK Arena i Remera, ikipe ya Patriotes Basketball Club yatsinze APR Basketball Club mu mukino wa 3 wa kamarampaka (playoffs) muri kimwe cya kabiri k’irangiza.
Uyu mukino warangiye Patriotes Basketball Club itsinze amanota 65 kuri 59 y’APR Basketball Club. Iyi yabaye intsinzi ya kabiri ya Patriotes ku ntsinzi imwe y’APR nyuma y’imikino 3 imaze kubahuza kuri iyi ntera yo gutanguranwa imikino 3 muri 5 iteganyijwe muri kimwe cya kabiri k’irangiza. Umukino wa kane w’uru rugamba uteganyijwe ku wa gatanu tariki 27 Kamena 2025 guhera i saa moya z’umugoroba.
Patriotes Basketball Club nitsinda uyu mukino wo ku wa gatanu izaba ibonye uburenganzira kwo gukina imikino ya nyuma ya playoff na ho APR Basketball club niramuka itsinze bizaba ngombwa ko hakinwa umukino wa gatanu ari na wo warangiza impaka.
Ikipe izashobora gusezerera indi hagati y’aya makipe abiri y’ibihangange muri shampiyona y’umukino wa Basketball mu Rwanda izahura na REG Basketball Club mu mikino ya nyuma ya playoffs aho bazaba batanguranwa gutsinda imikino 4 kuri 7. REG Basketball Club yasezereye United Generation Basketball Club (UGB) nyuma yo kuyitsinda imikino 3 yikurikiranya mu mikino 5 isanzwe iteganyijwe muri kimwe cya kabiri k’irangiza cya playoffs.
Jean Claude MUNYANDINDA