Ku wa kane tariki 20 Werurwe 2025, muri Komite Olempike Mpuzamahanga (Comité Internationale Olympique) habaye amatora y’umuyobozi mushya, Kirsty Coventry Umunyazimbabwekazi aba ariwe usekerwa n’amahirwe.
Ku nshuro ya mbere nyuma y’imyaka 131 CIO ishinzwe ni bwo bwa mbere igiye kuyoborwa n’umuntu w’igitsina gore. Uyu mugore w’imyaka 41 usanzwe ari Minisitiri w’Imikino muri Zimbabwe akaba yaranabaye umukinnyi ukomeye mu mukino wo koga yahigitse abandi bantu batandatu b’ibikomerezwa bari bahanganye. Abo bagabo yarushije amajwi muri aya matora yabereye mu Bugereki ni Juan Antonio Samaranche Junior (Espagne), Sebastian Coe (Angleterre), David Lappartient (France), Morinari Watanabe (Japon), Johan Eliasch (Suède/Angleterre) na Faisal Al Hussein (Jordanie).
Umuyobozi wa CIO ucyuye igihe Umudage Thomas Bach yifurije amahirwe masa umusimbura we amusobanurira ibibazo by’ingutu bimutegereje birimo guhangana n’ikoreshwa ry’imiti itemewe yongerera imbaraga abakinnyi. Yavuze ko amufitiye ikizere kuko yabaye umukinnyi ku rwego rwo hejuru bityo akaba asobanukiwe ibikenewe kugira ngo imikino irusheho gutera imbere.
Jean Claude MUNYANDINDA