Ku rutonde ngarukamwaka rukorwa n’ikinyamakuru Newsweek, ibitaro bya Mayo Clinic ni byo byongeye kuza ku isonga mu bitaro byiza kurusha ibindi ku isi muri uyu mwaka.
Ibi bitaro bije ku mwanya wa mbere ku nshuro 7 zikurikiranya. Uru rutonde rukorwa hashingiwe ku bushakashatsi mu bihugu 30 bihagaze neza mu rwego rw’ubuzima. Ibigenderwaho ni ireme ry’ubuvuzi, urwego rw’imikorere n’umutekano w’abarwayi. Amakuru akusanywa cyane cyane mu bakozi bagana ibitaro ndetse n’abakozi babyo.
Ibitari bya Mayo Clinic biherereye mu mujyi wa Rochester muri Leta ya Minnesota muri Leta Zunze Ubumwe z’Amerika. Iki gihugu kihariye imyanya y’imbere kuri uru rutonde rw’ibitaro byiza kurusha ibindi ku isi. Ku mwanya wa kabiri haza Cleveland Clinic yo muri Leta ya Ohio na ho ibitaro bya The Johns Hopkins Hospital byo muri Leta ya Maryland bikaza ku mwanya wa kane. Kuri uru rutonde umwanya wa gatatu uriho ibitaro bya Toronto General – University Health Network byo muri Kanada na ho ku mwanya wa gatanu hakaba ibitaro bya Karolinska Universitetssjukhuset byo muri Suwede.
Mary IRIBAGIZA