Wednesday, April 24
Shadow

Amavubi yerekeje muri Madagascar

Mu ijoro ryo ku itariki 17 rishyira kuri 18 Werurwe 2024 ikipe y’igihugu y’u Rwanda y’umupira w’amaguru yahagurutse i Kigali yerekeza Antananarivo muri Madagascar.

Abakinnyi 19 ni bo bafashe indege bagiye gukina imikino ibiri ya gicuti yo kwipima. Abandi bakinnyi batandatu bazabasanga muri Madagascar. Ku wa gatanu tariki 22 Werurwe 2024 Amavubi y’umutoza Frank Stippler azahura n’ikipe y’igihugu ya Botswana na ho ku wa mbere tariki ya 25 Werurwe 2024 u Rwanda rukazahura na Madagascar.

Iyi mikino ibiri ya gicuti yo kwipima izafasha ikipe y’igihugu y’u Rwanda kwitegura imikino y’umunsi wa 3 n’uwa 4 mu majonjora yo mu itsinda rya 3 muri Afurika mu rugendo rwo gushakisha itike yo kwerekeza mu gikombe k’isi cya 2026. Hagati y’itariki ya 3 n’iya 11 Kamena 2024, u Rwanda ruzahura na Benin ndetse na Lesotho.

Nyuma y’imikino ibiri kuri buri kipe muri iri tsinda rya 3, ikipe y’u Rwanda ni yo iri ku mwanya wa mbere ikagira amanota 4 kuri 6. Andi makipe ari muri iri tsinda ni Afurika y’Epfo, Zimbabwe, Benin, Nijeriya na Lesotho.

Jean Claude MUNYANDINDA

Leave a Reply

Your email address will not be published. Required fields are marked *