Urubuto rw’avoka ruri mu kiciro k’ibiribwa birimo ibinyamavuta. Hari abashobora gukeka ko ayo mavuta ashobora kugira ingaruka zitari nziza ku mubiri; abahanga mu by’ubuzima n’imirire ariko bemeza ko avocat ari ingenzi bakanerekana ibyiza 10 byayo.
1.Avoka yifitemo ubushobozi bwo kurwanya cancer y’imyanga ndangagitsina ku bagabo
Iki kiribwa gituma abakunda kugifata kenshi badahura n’ibyago byo gufatwa na cancer ya prostate kandi avoka ikaba yatuma iyi ndwara mu gihe yagaragaye idakwirakwira mu bindi bice by’umubiri.
2.Irwanya cancer yo mu kanwa
Avoka yifitemo intungamubiri zishobora kwerekana ibice byo mu kanwa bishobora kwibasirwa na cancer zikaba zakingira ayo makuba hakiri kare.
3.Ifite ubushobozi bwo gukumira cancer yo mu ibere
Ubushakashatsi bwerekanye ko avoka kimwe na huile d’olive, kubera ko bikize kuri acide oléique, ishobora gutuma abagore bakunze kuyirya badafatwa na cancer y’ibere.
4.Ikingira amaso
Za lutéines ziba muri avoka zituma abakunda uru rubuto bahangana n’indwara zibasira amaso harimo n’indwara y’ishaza ikunze kugaragara cyane ku bageze mu zabukuru.
5.Avoka igabanya chorestérol
Ubushakashatsi bwakozwe ku bantu 45, bwerekanye ko nyuma y’icyumweru kimwe gusa bagabanyije chorestérol yari iri mu mubiri wabo ku gipimo cya 17%. Ubwo bushobozi buterwa n’intungamubiri za beta-sitostérol avoka ikizeho.
6.Ituma ibyago byo kurwara umutima bigabanuka.
Vitamini E na Glutathion biba muri avoka ni urukingo rwiza rufasha abantu bakunda izi mbuto bagabanura amakuba yo kurwara umutima.
7.Avocat irinda ubwonko
Kubera intungamubiri zo mu bwoko bwa folate dusanga ku bwinshi muri avoka, iki kiribwa gifatwa nk’urukingo rwiza rurinda ubwonko.
8.Amafunguro aherekejwe n’avoka ayoboka neza ingingo z’umubiri
Ubushakashatsi ku bugendanye n’imirire bwerekanye ko ibyo kurya birimo avoka biyoborwa mu ngingo z’umubiri ku gipimo kingana n’inshuro 5 zose ugereranyije n’amafunguro atarimo avoka.
9.Ni ikiribwa kirinda gusaza imburagihe
Intungamuburi za glutathion dusanga muri avoka ni zo zifasha guhangana n’indwara yo kugaragara nk’umuntu ushaje.
10.Avoka ni ikiribwa cy’ikirindandwara muri rusange
Vitamine E iboneka ku gipimo kiri hejuru muri avoka ituma uru rubuto ruza mu biribwa biri ku isonga mu birinda indwara zinyuranye muri rusange.
Gentil KABEHO