Ikipe ya APR Basketball Club imaze iminsi ine muri Qatar aho yagiye gukomereza umwiherero wo kwitegura Basketball Africa League 2024 yaraye itsinze umukino wayo wa mbere wayihuje na Al Wakram yo muri icyo gihugu.
Muri uyu mukino ikipe y’abasirikare b’u Rwanda yagaragaje ingufu nyinshi urangira itsinze Al Wakram amanota 108 kuri 80. Umukinnyi mushya uri mu bo APR Basketball Club iherutse gusinyisha ari we Dario Nathan Henry Hunt ari mu bagaragaje urwego rwo hejuru. Batanu babanje mu kibuga ku ruhande rw’APR Basketball Club ni Michael Dixon, Jean Jacques Wilson Nshobozwabyosenumukiza, Adonis Filer, Bush Wamukota na Dario Nathan Henry Hunt.
APR Basketball Club isigaje gukina indi mikino ine ya gicuti mu rwego rwo kwipima. Kuri uyu wa gatanu irahura na Al Rayyan, ku cyumweru ikazongera gukina na Al Wakram. Ku wa mbere tariki 26 Gashyantare izongera ihure na Al Rayyan ku nshuro ya kabiri hanyuma izasoze imikino yayo ya gicuti muri Qatar ku wa gatatu tariki ya 28 Gashyantare ihura n’ikipe y’abakinnyi beza batoranyijwe muri icyo gihugu.
Mu irushanwa rya BAL 2024, ikipe y’APR Basketball Club iri mu itsinda rya Sahara (Sahara Conference) rizakinira i Dakar muri Senegali muri Gicurasi 2024. Iri mu itsinda rimwe na AS Douanes yo muri Senegali, US Monastir yo muri Tuniziya na Rivers Hoopers yo muri Nijeriya.
Jean Claude MUNYANDINDA