Kuri uyu wa gatatu tariki ya 26 Mata 2023 mu nzu y’imikino yitiriwe Hassan Moustafa i Kayiro mu Misiri hazatangira imikino y’itsinda rya Nili mu irushanwa rya Basketball Africa League 2023. Mukerarugendo.rw igiye kubagezaho mu nshamake ishusho y’amakipe atandatu agize iryo tsinda.
1.Al Ahly (Misiri) : Iyi kipe igiye kwitabira Basketball Africa League ku nshuro ya mbere, kuko ku nshuro ebyiri ziheruka Misiri yahagarariwe na Zamalek. Al Ahly izaba ikinira mu rugo, igiye guseruka iyobowe n’umutoza Julbe Augusti, Umunyaespanye w’imyaka 50 y’amavuko. Mu bakinnyi izaba igenderaho harimo kabuhariwe Walter Hodge, Umunyaportorico wabaye umukinnyi wahize abandi mu irushanwa rya Basketball Africa League rya mbere i Kigali mu Rwanda. Icyo gihe Hodge yakiniraga Zamalek ari na yo yegukanye igikombe.
2.Petro de Luanda (Angola): Iyi kipe igiye kwitabira BAL ku nshuro ya gatatu. Ubwa mbere yegukanye umwanya wa gatatu, na ho ku nshuro ya kabiri itsindirwa ku mukino wa nyuma na US Monastir yo muri Tuniziya. Umutoza wa Petro de Luanda, Umunyabrezili José Alves dos Santos Neto, avuga ko igihe ari iki ngo we n’abakinnyi be baterure igikombe cya BAL. Mu ntwaro zikomeye uyu mutoza azifashisha muri iri iyi mikino yo mu itsinda rya Nili harimo Ater Majok, Damian Hollis, Solo Diabaté, Carlos Morais, Childe Dundao n’abandi.
3.Cape Town Tigers (Afurika y’Epfo): Ni ku nshuro ya kabiri iyi kipe igiye kwitabira Basketball Africa League kuko n’umwaka ushize yari ihari igarukira muri kimwe cya kane k’irangiza isezerewe na US Monastir yo muri Tuniziya. Uyu mwaka Cape Town Tigers yabonye itike imaze kwegukana umwanya wa mbere mu majonjora ya nyuma yahuzaga amakipe yo mu kerekezo k’iburasirazuba. Mu bakinnyi ngenderwaho ba Cape Town Tigers hari Evans Ganapamo, Michael Gbinije na Pieter Prinsloo.
4.Seydou Legacy Athletic Club (Gineya): Iyi kipe igiye kwitabira irushanwa rya BAL ku nshuro ya kabiri. SLAC itozwa n’Umunyaseribiya Zeljko Zecevic, muri iyi mikino izaba icungira ku mukinnyi Dane Miller Junior ukomoka muri Leta Zunze Ubumwe z’Amerika. Umwaka ushize SLAC yaviriyemo muri kimwe cya kane k’irangiza ikuwemo na Zamalek yo mu Misiri.
5.Ferroviario da Beira (Mozambike): Iyi kipe imaze imyaka 98 ishinzwe igiye kwitabira BAL ku nshuro ya kabiri. Umwaka ushize yagarukiye mu kiciro k’itsinda rya Sahara ryakiniraga i Dakari muri Senegali. Mu bakinnyi b’ingenzi Ferroviario da Beira yitwaje uyu mwaka harimo Umunyamerika Will Perry, Helton Ubisse na Ismael Nurmamade.
6.City Oilers (Uganda): Iyi kipe izaba ari umushyitsi muri iri rushanwa rya BAL kuko igiye kuryitabira ku nshuro yayo ya mbere. Itike yo kugera kuri iyi ntera yayibonye nyuma yo kwegukana umwanya wa gatatu mu kerekezo k’iburasirazuba itsinze ikipe y’Urunani yo mu Burundi. Umwe mu bakinnyi ngenderweaho ba City Oilers ni Falando Jones.
Amakipe azarangiza mu myanya ine ya mbere muri iri tsinda rya Nili aziyongera ku yandi makipe ane yazamukiye mu itsinda rya Sahara, hanyuma yose uko ari 8 azahurire mu Rwanda mu kwezi kwa gatanu 2023 mu mikino isoza irushanwa rya Basketball Africa League ry’uyu mwaka. Amakipe ane yaboneye itike mu itsinda rya Sahara ni Stade Malien yo muri Mali, AS Douanes yo muri Senegali, REG Basketball Club yo mu Rwanda na ABC Fighters yo muri Kote Divuwari.
Jean Claude MUNYANDINDA