Monday, June 24
Shadow

BAL 2023: Petro de Luanda yakatishije itike yerekeza i Kigali muri playoffs

Ku cyumweru tariki 30 Mata 2023 ikipe ya Petro de Luanda yo muri Angola yabaye ikipe ya mbere yo mu itsinda rya Nili ibonye uburenganzira bwo kuzakina imikino ya Kamarampaka mu irushanwa rya Basketball Africa League ry’uyu mwaka wa 2023.

Ibi yabigezeho nyuma yo gutsinda umukino wayo wa gatatu muri iri tsinda wayihuje na Cape Town Tigers yo muri Afurika y’Epfo. Uyu mukino warangiye abasore b’umutoza José Neto batsinze amanota 87 kuri 48 ya Cape Town Tigers. Iyi ntsinzi yakurikiye izindi ebyiri; ubwa mbere Petro de Luanda yatsinze City Oilers yo muri Uganda amanota 89 kuri 71 mu mukino wabaye ku wa kane tariki 27 Mata. Petro de Luanda yakurikijeho Ferroviario da Beira yo muri Mozambike na yo iyitsinda itayibabariye amanota 101 kuri 76.

Ater Majok umwe mu bakinnyi ba Petro de Luanda

Gutsinda imikino itatu kwa Petro de Luanda birashimangira ko yabonye itike yo kuzaseruka mu mikino ya Kamarampaka (playoffs) izabera muri BK arena i Kigali mu Rwanda kuva ku itariki ya 20 kugeza ku ya 27 Gicurasi 2023. Icyo iyi kipe igiye guharanira ni ukwegukana umwanya wa mbere muri iri tsinda. Isigaje imikino ibiri; ku wa gatatu tariki 3 Gicurasi 2023 izahura na Seydou Legacy Athletic Club (SLAC) yo muri Guineya na ho ku wa gatanu ikazacakirana na Al Ahly yo mu Misiri.

Jean Claude MUNYANDINDA

 

Leave a Reply

Your email address will not be published. Required fields are marked *