Monday, March 4
Shadow

BAL 2023: REG Basketball Club yongeye kwisanga mu itsinda rya Sahara.

Ku wa mbere tariki 13 y’uku kwezi kwa kabiri abategura irushanwa rya Basketball Africa League bashyize ahagaragara uko amatsinda ya Sahara na Nili azaba ateye ndetse n’ingengabihe y’iyi mikino ihuza amakipe y’intyoza mu mukino wa Basketball muri Afurika.

Amakipe 6 yisanze mu itsinda rya Sahara ni AS Douanes yo Muri Senegali, Abidjan Basketball Club – ABC Fighters yo muri Kote Divuwari, Kwara Falcons yo muri Nijeriya, Stade Malien yo muri Mali, US Monastir yo muri Tuniziya na Rwanda Energy Group (REG) Basketball Club yo mu Rwanda. Iri tsinda rizakinira muri Dakar Arena muri Senegali kuva ku itariki ya 11 kugeza ku ya 21 mu kwezi kwa gatatu.

Mu itsinda rya Nili harimo Al Ahly yo mu Misiri, Petro de Luanda yo muri Angola, Seydou Legacy Athletic Club (SLAC) yo muri Gineya, Ferroviario da Beira yo muri Mozambike, Cape Town Tigers yo muri Afurika y’Epfo na City Oilers yo muri Uganda. Imikino yo muri iri tsinda rya Nili izabera mu nzu y’imikino yitiriwe Hassan Mostafa i Kayiro mu Misiri kuva ku itariki ya 26 y’ukwezi kwa kane kugeza ku ya 6 y’ukwezi kwa gatanu.

Uko amatsinda ya Sahara na Nili ahagaze

Muri buri tsinda hazazamuka amakipe 4 bityo amakipe 8 azarokoka akazahurira mu Rwanda muri BK Arena i Remera mu mikino ya kamarampaka (playoffs) iteganyijwe hagati y’itariki ya 21 n’iya 27 mu kwezi kwa gatanu.

Mu gikorwa cyo kumurika gahunda y’imikino ya Basketball Africa League y’uyu mwaka wa 2023 ndetse n’uko amatsinda ateye, umuyobozi wayo Amadou Gallo Fall yavuze ko iri rushanwa rizaba riri ku rwego rwo hejuru bitewe n’uko amakipe 12 yageze kuri iki kiciro cy’amatsinda abanje kwiyuha akuya.

Ikipe ya US Monastir yo muri Tuniziya ni yo yegukanye igikombe cya Basketball Africa League umwaka ushize wa 2022 itsinze Petro de Luanda yo muri Angola ku mukino wa nyuma. Icyo gihe na bwo imikino ya kamarampaka yari yabereye muri BK Arena i Remera. Ikipe ya REG Basketball Club yari ihagarariye u Rwanda yaviriyemo muri kimwe cya kane k’irangiza isezerewe na Forces Armées et Police (FAP) yo muri Kameruni.

Jean Claude MUNYANDINDA

Leave a Reply

Your email address will not be published. Required fields are marked *