Wednesday, April 24
Shadow

BAL 2024: COSPN yakatishije itike yo kujya muri Elite 16

Urugamba rwo gushakisha itike yo kwitabira irushanwa rya Basketball Africa League rurakomeje. Ikipe ya Club Omnisport de la Police Nationale (COSPN) yo muri Madagasikari imaze gukatisha itike yo kwerekeza mu kiciro gihuza amakipe 16 y’intyoza.

Mu mikino yo mu itsinda rya 5 mu majonjora y’ibanze y’iri rushanwa rya BAL, COSPN yatsinze andi makipe bari bahanganye ari yo Beau Vallon Heat yo mu birwa bya Seychelles na Ushindzi Club yo mu birwa bya Comores. Ikipe ya Roche Bois Warriors yo mu birwa bya Maurice na yo yari itegerejwe muri iyi mikino yaberaga mu nzu y’imikino ya Mahamasina mu mujyi wa Antananarivo muri Madagasikari, ariko byarangiye itewe mpaga kuko itigeze ihagera.

Umukino wahesheje ikipe ya COSPN urupapuro rw’inzira ruzayerekeza i Johanesbourg muri Afurika y’Epfo mu kiciro gikurikiraho cya BAL ku makipe aherereye mu gice k’i Burasirazuba, ni uwayihuje na Beau Vallon Heat warangiye ikipe y’abapolisi ba Madagasikari itsinze amanota 76 kuri 57.

Umutoza wa COSPN Julien Cheniot atangaza ko feri ya mbere ari i Kigali mu Rwanda mu mikino ya Kamarampaka. Kapiteni w’iyi kipe Livio Ratsianarives, asanga n’ubwo bitwaye neza bagifite byinshi byo gukora.

Club Omnisport de la Police Nationale yo muri Madagasikari

Nyuma y’imikino yo mu itsinda rya 5 ryakiniraga muri Madagasikari, uru rugendo rwerekeza muri BAL 2024 rukomereje i Yawunde muri Kameruni, aho amakipe 5 yo mu itsinda rya 2 arimo kurwanira imyanya 2 yo kwerekeza mu kiciro gikurikiraho kizahuza amakipe 16 y’intyoza kurusha ayandi muri Afurika. Ayo makipe agomba kwishakamo abiri, ni Forces Armées et Police yo muri Kameruni, Bangui Sporting Club yo muri Repubulika ya Santarafurika, Lamantins yo muri Cadi, Espoir Basketball Club yo muri Gabon na Virunga Basketball Club yo muri Repubulika ya Demokarasi ya Kongo.

Uru rugamba rwo mu matsinda y’ibanze ruzakomereza i Dar es Salaam muri Tanzaniya ahazakinira amakipe yo mu itsinda rya 3 n’i Gaborone muri Botwana ahazahurira itsinda rya 4. Imikino yo mu itsinda rya 1 yari iteganyijwe i Benghazi muri Libiya ntabwo ikibaye. Impamvu ni uko amakipe ya Nigelec Basketball Club yo muri Nijeri na Elan Coton Basketball Club yo muri Benin yikuyemo adakinnye, bituma Al Ahly Benghazi yo muri Libiya na FUS Rabat yo muri Maroke yibonera itike yo kwerekeza nta mpaka Abidjan muri Kote Divuwari mu kiciro gikurikiraho.

Mu ntera y’iri rushanwa rya BAL izahuza amakipe 16 y’intyoza, usibye amakipe arimo kurwana inkundura aharanira kugerayo, hari ayamaze kwibonera uburenganzira bwo gukina iki kiciro kubera ko yitwaye neza ku rugero runaka muri BAL iheruka. Ayo makipe atandatu yasonewe kunyura mu kayunguruzo ko mu matsinda y’ibanze ni Ferroviario da Beira yo muri Mozambike, Cape Town Tigers yo muri Afurik a y’Epfo, City Oilers yo muri Uganda, ABC Fighters yo muri Kote Divuwari, Stade Malien yo muri Mali na Seydou Legacy Athletic Club yo muri Gineya.

Nk’uko no mu ntoranywa habamo indashyikirwa kurusha izindi, hari kandi amakipe 6 yahawe inda ya bukuru kubera ko amakipe yari ahagarariye ibihugu akomokamo yitwaye mu buryo bushimishije mu marushanwa atatu yatambutse ya BAL, bityo yo akazatangirira aho rukomeye, mu kiciro cy’amatsinda yiswe conferences ari na cyo kibanziriza kamarampaka. Ayo makipe 6 afatwa nk’ubukombe muri BAL ni Al Ahly yo mu Misiri, Petro de Luanda yo muri Angola, US Monastir yo muri Tuniziya, AS Douanes yo muri Senegali, APR Basketball Club yo mu Rwanda ndetse n’ikipe izatwara igikombe cya shampiyona ya Basketball muri Nijeriya.

Jean Claude MUNYANDINDA

 

Leave a Reply

Your email address will not be published. Required fields are marked *