Ku wa gatandatu tariki ya 4 y’ukwezi kwa 5 i Dakari muri Senegali hazatangira imikino yo mu itsinda rya Sahara mu irushanwa rya Basketball Africa League 2024. Ese amakipe ane agize iri tsinda ahagaze ate?
AS Douanes (Senegali): Iyi kipe izaba ikinira mu rugo imbere y’abafana bayo mu nzu y’imikino ya Dakar Arena. Iyi kipe iterwa inkunga n’ikigo gishinzwe amahoro muri Senegali izaba iserutse muri Basketball Africa League ku nshuro ya gatatu. Umwaka ushize wa 2023, umutoza wayo Pabi Guèye n’abasore be bakoze ibyo abantu benshi batatekerezaga, bagera ku mukino wa nyuma ariko batsindwa n’igihangange National Al Ahly yo mu Misiri amanota 80 kuri 65. AS Douanes imaze imyaka 44 ishinzwe, izitabaza abakinnyi bamenyereye iri rushanwa rya BAL nka Thomas Ibrahima, Christopher Obekpa, Jean Jacques Boissy na Mike Fofana.
US Monastir (Tuniziya): Ni ikipe y’igishyitsi mu ruhando rwa Basketball muri Afurika. Iyi ni inshuro ya kane US Monastir yitabira BAL. Yegukanye igikombe k’iri rushanwa mu mwaka wa 2022 itsinze Petro de Luanda yo muri Angola amanota 83 kuri 72 ku mukino wa nyuma. Iyi kipe imaze imyaka 101 ishinzwe, mu irushanwa nk’iri ry’umwaka wa 2023 yaratsikiye iviramo mu kiciro k’imikino yo mu itsinda rya Sahara. Mu bakinnyi bakomeye yaje yijwaje uyu mwaka harimo Oussama Marnaoui, Firas Lahyani, Ater Majok, Christopher Crawford na Mokthar Ghayaza.
Rivers Hoopers (Nijeriya): Igiye kwitabira Basketball Africa League ku nshuro ya kabiri. Ubwa mbere hari mu mwaka wa 2021 i Kigali mu Rwanda aho yasezerewe mu kiciro k’itsinda. Rivers Hoopers yashinzwe mu mwaka wa 2005. Ikinira mu nyubako y’imikino ya Leta ya Rivers yakira abafana 2000. Umwe mu bakinnyi b’intyoza izaba igenderaho muri iyi mikino yo mu itsinda rya Sahara ni William Perry, Umunyamerika w’imyaka 29 wari umaze iminsi akinira Patriotes Basketball Club yo mu Rwanda.
APR Basketball Club (Rwanda): Iyi kipe y’abasirikare b’u Rwanda igiye kwitabira iri rushanwa ku nshuro ya mbere. N’ubwo ari abashyitsi muri uru rugamba rutoroshye rwa Basketball muri Afurika, umunyamabanga mukuru w’APR Basketball Club Eric Kalisa Salongo yatangaje ko intego yabo ari ukwitwara neza bakagera nibura ku mukino wa nyuma. Abakinnyi b’imena umutoza Mazen Trakh w’APR Basketball Club yahagurukanye barimo Adonis Filer, Noel Obadiah, Jean Jacques Wilson Nshobozwabyosenumukiza, Abdullah Ahmed Mohammed na Dario Hunt.
Umukino ufungura muri iri rushanwa rihuza amakipe yo mu itsinda rya Sahara uzahuza APR Basketball Club na US Monastir ku wa gatandatu tariki ya 4 y’ukwezi kwa 5 umwaka wa 2024 guhera i saa kumi n’igice z’umugoroba ku isaha yo mu Rwanda no mu Burundi.
Amakipe 5 ku makipe 8 azakina imikino ya kamarampaka (playoffs) izabera i Kigali mu Rwanda ni FUS Rabat (Maroke), Petro de Luanda (Angola), Cape Town Tigers (Afurika y’Epfo), National Al Ahly (Misiri) na Al Ahly Benghazi (Libiya). Andi makipe 3 azamenyekana nyuma y’iyi mikino yo mu itsinda rya Sahara.
Jean Claude MUNYANDINDA